- Están dirixidas a impulsar a modernización e mellora das infraestruturas dos establecementos turísticos de aloxamento e restauración.
A convocatoria de axudas para a modernización e mellora de infraestruturas en establecementos turísticos de aloxamento e restauración continúa aberta. Esta liña de subvencións, enmarcada no procedemento TU503A, busca fortalecer a competitividade do sector a través de investimentos que optimicen a accesibilidade, eficiencia enerxética, dixitalización e calidade das instalacións.
Os negocios interesados poderán presentar a súa solicitude ata o 11 de marzo ás 23:59 h, sempre que os proxectos subvencionables fosen iniciados a partir do 1 de xaneiro de 2025.
Que melloras poden optar á subvención? Entre as actuacións financiables inclúense:
- Actuacións destinadas a mellorar as condicións de accesibilidade e supresión de barreiras arquitectónicas.
- Obras destinadas á mellora das instalacións coa finalidade de obter certificacións de calidade, en especial o Q de Calidade Turística.
- Actuacións destinadas á adaptación ás modificacións normativas e á mellora da clasificación do establecemento que supoñan un incremento de categoría.
- Actuacións de renovación e modernización das instalacións e embelecemento do contorno da instalación.
- Equipamentos mobles necesarios para o funcionamento.
- Actuacións de mellora da climatización que favorezan a sostibilidade coa implementación de medidas de aforro enerxético, así como a instalación ou mellora de sistemas de extracción e renovación do aire.
- Actuacións de dixitalización dos sistemas de xestión e comercialización do establecemento. O investimento en equipamentos e telefonía móbil non poderá ser superior ao 5 % do orzamento total do proxecto ou da contía xustificada.
- Adaptación dos sistemas de seguridade e saúde na prestación de servizos.
O investimento neto admitido para cada proxecto pode chegar ata os 100.000 euros, cunha subvención que cobre ata o 60% do orzamento total, cun máximo de 60.000 euros por beneficiario.