- A inscrición pódese facer previamente na web da central de reservas ou de xeito presencial nas casetas de información de Cíes e Ons o propio día da visita.
- As excursións faranse en grupos reducidos para ofrecer unha experiencia de calidade.
Un ano máis a Xunta de Galicia pon en marcha o seu programa de rutas guiadas para visitar o Parque Nacional marítimo-terrestre das Illas Atlánticas de Galicia durante o verán. Desta quenda son 350 as rutas organizadas, con aproximadamente 4.000 prazas dispoñibles.
Todas as visitas son gratuítas, mais os visitantes deberán facerse cargo do traslado ata a illa. Co fin de ofrecer unha experiencia da máxima calidade, todas as rutas faranse en grupos reducidos.
No caso de Cíes e Ons, as persoas interesadas poderán apuntarse de xeito presencial nas casetas de información localizadas nas propias illas ou a través da central de reservas. As visitas con guía realizaranse diariamente ata o venres, 15 de setembro. Ademais disto, tamén se organizan excursións (con 250 prazas) todos os mércores ás 12:00 horas durante os meses de xullo e agosto no caso de Cíes, e os xoves á mesma hora no de Ons.
Para Cortegada e Sálvora realizaranse excursións para grupos de 10 a 15 persoas, con 154 prazas en total. A reserva só se poderá realizar a través da páxina web habilitada. Para Cortegada ofrécense 6 visitas todos os domingos, desde o 23 de xullo ata o 27 de agosto. Para Sálvora: o mesmo número de visitas, pero cada luns desde o 24 de xullo ao 28 de agosto.
A solicitude a través da central de reservas das visitas polos arquipélagos de Sálvora e Cortegada poderá facerse ata o xoves anterior ao da excursión; e para Cíes e Ons ata 24 horas antes da realización da ruta para reservas en liña, ou no mesmo día en caso de anotarse de xeito presencial.