Máis de 400 profesionais daranse cita para abordar os retos máis importantes que afronta esta industria
A Confederación Española de Hoteis e Aloxamentos Turísticos (CEHAT) decidiu que sexa Salamanca a sede do próximo Congreso de Hostaleiros Españois, que se celebrará o mes de novembro. Durante tres xornadas máis de 400 empresarios hostaleiros de toda España daranse cita neste congreso anual para debater a situación actual do sector e os seus principais retos de futuro.
Organizado pola CEHAT en colaboración coa Asociación de Empresarios de Hostalaría de Salamanca, o evento celebrarase do 16 ao 19 de novembro no Palacio de Congresos e Exposicións de Castela e León, situado no casco antigo da cidade de Salamanca, o que lle permitirá á cidade fortalecer a súa aposta polo sector MICE e dar mostra dunha planta hostaleira moderna e dinámica.
O Congreso realízase cada dous anos e converteuse xa nun dos máis importantes do sector ao ser un foro de debate do sector hostaleiro español. Nesta nova edición buscarase estimular aos profesionais que compoñen a industria hostaleira a través de relatorios, debates, propostas e recursos que contribúan a consolidar o posicionamento do sector como referencia internacional. Contará con relatores de gran prestixio que achegarán novos enfoques en relación ás diferentes áreas da xestión hostaleira.